දැක්ම
සමථකරණය තුළින් සංහිඳියාව සහ සමාජ සහජීවනය
දැක්ම
සමථකරණය තුළින් සංහිඳියාව සහ සමාජ සහජීවනය
මෙහෙවර
ලාංකික ප්‍රජාව හා සබැඳි කාර්ෂයක්ෂම ආරවුල් විසඳීමේ විකල්ප ක්‍රමවේදයක් දිවයින පුරා ප්‍රචලිත කිරීම
'සමථ මණ්ඩල කොමිෂන් සභාව' යනු 1988 සමථ මණ්ඩල පනත යටතේ පිහිටුවන ලද ස්වාධීන ආයතනයකි. මෙම කොමිෂන් සභාව සාමාජිකයින් 5 දෙනෙකුගෙන් සමන්විත වන අතර, ව්‍යවස්ථානුකූලව ඉන් දෙදෙනෙකු උසස් අධිකරණයක විශ්‍රාමික විනිසුරුවන් විය යුතුය.
අධිකරණ අමාත්‍යාංශයේ පරිපාලනමය සහ ප්‍රතිපත්තිමය සහාය සහිතව සමථ මණ්ඩල කොමිෂන් සභාව විසින් සමථකරණ වැඩසටහන මෙහෙයවනු ලබයි. දැනට ප්‍රජා සමථ මණ්ඩල 329 ක් සහ ඉඩම් සමථ මණ්ඩල 16 ක් සමථ මණ්ඩල කොමිෂන් සභාව යටතේ ක්‍රියාත්මක වේ.
කොමිෂන් සභාවේ මූලික බලතල සහ කාර්යයන් පහත පරිදි වේ.
සමථ පුහුණු නිලධාරීන් අධිකරණ අමාත්‍යාංශයේ සේවයේ නියුතු රජයේ පරිපාලන සේවයේ නිලධාරීන් පිරිසකි. ඔවුන්ගේ වගකීම සමථකාරවරුන් පුහුණු කිරීම සහ සමථ මණ්ඩල අධීක්ෂණය කිරීමයි. සමථ පුහුණු නිලධාරීන් විසින් ප්‍රජා සමථකරණය පිළිබඳව ජනතාව දැනුවත් කිරීම සඳහා දැනුවත් කිරීමේ වැඩසටහන්ද පවත්වනු ලැබේ.
සමථ පුහුණුකරුවන් ද, ඔවුන්ගේ සමථකරණ කුසලතා සහ ප්‍රවීණත්වය වැඩිදියුණු කරගැනීම සඳහා පුහුණුව ලබා ගනී. ජාත්‍යන්තර සහ දේශීය සමථකරණ විශේෂඥයින් විසින් ස්ත්‍රී පුරුෂ සමාජභාවය, විවිධත්වයට සංවේදීතාව, සමථ මණ්ඩල කළමනාකරණය, දත්ත එකතු කිරීම වැනි පුළුල් තේමා යටතේ සමථ පුහුණු නිලධාරීන්ට විශේෂිත පුහුණුවක් ලබාදෙනු ලැබේ. එමෙන්ම, වර්තමානයේ පවතින නීති රීති පිළිබඳව හා (විශේෂ සමථකරණයකදී අනිවාර්ය වන) විෂය කරුණු පිළිබඳ ප්‍රවීණතාවයේ වැදගත්කම පිළිබඳව ද ඔවුන් දැනුවත් කෙරේ.
සමථ මණ්ඩල කොමිෂන් සභාවේ කාර්යයන් සඳහා සමථ සංවර්ධන නිලධාරීන් සහාය ලබා දෙන අතර, මේ සඳහා සමථ සංවර්ධන නිලධාරීන් ශ්‍රී ලංකාව පුරා ඇති සියලුම ප්‍රාදේශීය ලේකම් කාර්යාලවල ස්ථානගත කර ඇත. ඔවුන්ගේ මෙම මූලික කාර්යයට අමතරව සමථ සංවර්ධන නිලධාරීන් දත්ත රැස් කිරීම, සමථකරණය පිළිබඳ දැනුවත් කිරීම වැනි කාර්යයන් සඳහා ද සහාය වේ. සමථකරණයේ ප්‍රගතිය සොයාබැලීම සඳහා සමථ සංවර්ධන නිලධාරීන්, සමථ පුහුණු නිලධාරීන් හා එක්ව කටයුතු කරයි.
සමථකාරවරයෙකු ආරවුලකට සම්බන්ධ පාරශ්ව අතර සාකච්ඡා ක්‍රියාවලියට පහසුකම් සපයන මධ්‍යස්ථ තෙවන පාරශ්වයක් ලෙස කටයුතු කරයි. සමථකාරවරයෙකුගේ මූලික කාර්යභාරය වන්නේ අදාළ පාර්ශ්වයන් හට ඔවුන්ගේ අවශ්‍යතා සහ සැලකිලිමත් විය යුතු කාරණා අවබෝධ කර ගැනීමට සලස්වා සහ ඔවුන් සමගි සම්පන්න විසඳුමක් කරා යොමු කිරීමයි.
ශ්‍රී ලංකාවේ සමථකරණ වැඩසටහනට සම්බන්ධ ස්වේච්ඡා සමථකාරවරුන් ගණන 8600 ඉක්මවයි. සමථකාරවරුන් වශයෙන් තෝරා ගැනීමේ අවසන් වටයන්ට පෙර, අධිකරණ අමාත්‍යාංශයට අනුයුක්ත සමථ පුහුණුකරුවන් විසින් පවත්වනු ලබන සමථකරණ කුසලතා සහ ශිල්පීය ක්‍රම පිළිබඳව දින පහක සමථකරණ පුහුණුවක් ඔවුන්ට ලැබේ. සෑම වසර 3 කට වරක් සමථ මණ්ඩල පිහිටුවීමේදී එවැනි පුහුණුවීම් පැවැත්වෙන අතර, පුහුණුව අවසානයේ සුදුසුකම් ලබන අපේක්ෂකයින් සමථකාරවරුන් බවට පත්වේ.
සමථ මණ්ඩල සඳහා සමථකාරවරුන් පත් කිරීම කල් ගතවන කටයුත්තකි. එම ක්‍රියාවලියේ පියවරයන් පහත දැක්වේ.
යම් ප්‍රදේශයක සමථ මණ්ඩලයක් පිහිටුවීම පිළිබඳ ගැසට් නිවේදනයක් නිකුත් කළ පසු ඕනෑම පුද්ගලයෙකුට, ආයතනයකට හෝ සංවිධානයකට නාමයෝජනා ඉදිරිපත් කළ හැකි අතර, පත් කිරීමට සුදුසු පුද්ගලයින් හා ඔවුන්ගේ සුදුසුකම් නිර්දේශ සහිතව ඉදිරිපත් කළ යුතුය.
පුද්ගලයෙකු සමථකාරවරයෙකු ලෙස පත් කිරීමට ඇති සුදුසුකම් මීට අදාළ පනතේම දක්වා ඇති අතර, ප්‍රධාන නිර්ණායකය වශයෙන් පදිංචිය, එනම් අදාළ ප්‍රාදේශීය ලේකම් කොට්ඨාශයේ පදිංචිව සිටීම, සේවය කිරීම හෝ එම කොට්ඨාශයේ සේවය කරන රාජ්‍ය නිලධාරියෙකු වීම, ආදිය දක්වා ඇත.
සම්මුඛ පරීක්ෂණ මාලාවක් අවසානයේ මූලික තේරීමක් සිදු කෙරේ.
තෝරාගැනීමෙන් පසුව අයදුම්කරුවන් සමථකරණය පිළිබඳ කුසලතාපුහුණුවකට යොමු කරනු ලැබේ. අභියෝග්‍යතා සහ යෝග්‍යතා පරීක්ෂණයකට පසු අවසාන තේරීම සිදුකෙරෙන අතර, යෝග්‍යතාවය පිළිබඳ අවසන් තීරණය අධිකරණ අමාත්‍යාංශයේ සමථ පුහුණු නිලධාරීන් සතු ය.
