1988 අංක 72 දරණ සමථ මණ්ඩල පනත අනුව 1990 වර්ෂයේදී ශ්‍රී ලංකාවේ පළමු ප්‍රජා සමථ මණ්ඩල පිහිටුවන ලදී. සමථ මණ්ඩල, ස්වාධීන සමථ මණ්ඩල කොමිෂන් සභාවක් යටතේ පවතින අතර, අධිකරණ අමාත්‍යාංශයේ ප්‍රතිපත්ති අධීක්ෂණය සහ පරිපාලන සහාය සහිතව ක්‍රියාත්මක වේ. වර්තමානය වන විට ප්‍රජා මට්ටමින් මුළු දිවයිනම ආවරණය වන පරිදි ප්‍රජා සමථ මණ්ඩල 329 ක් ඇති අතර, ඊට සහය වන පුහුණු ස්වේච්ඡා සමථකාරවරුන් ගණන 8,600 ඉක්මවයි. මෙම සමථකාරවරුන්ගෙන් 29%ක් කාන්තාවන් වේ. සාමාන්‍යයෙන් වසරකට ආරවුල් 250,000 කට වඩා සමථයට පත් කරන අතර, ප්‍රතිශතයක් ලෙස මෙය ඉදිරිපත් වන ගැටුම් අතරින් 65% ඉක්මවයි. මීට අමතරව, විශේෂිත වූ භූගෝලීය ප්‍රදේශවල විශේෂිත සමාජ හා ආර්ථික ගැටලු (උදා: ඉඩම් සහ මූල්‍ය ආරවුල් ආදිය) සඳහා මැදිහත් වීමට විශේෂ සමථ මණ්ඩල කිහිපයක් පිහිටුවා ඇත.